Perfil - Konaba Hau

Perfil - Konaba Hau

Carlos da Silva FR Saky Lopes

Moris iha 15/08/65, iha Uatu-Lari/Vikeke. Hasai 3ª Klase iha 1974. 

Durante periodu ida la eskola tamba halai iha ai-laran. Iha fins de 1978 tun hikas hosi Matebian, kontinua eskola iha Kelas IV SD. 

Tinan 1980 ba Dili, tama iha SMPK Paulos VI, depois kontinua ba SMAK St. Yoseph Dili. Iha 1986 hetan bolsa estudu, kontinua estudus ba iha Universidade Udayana Denpasar/Bali. Foti kursu Engenheria Civil. Eskola la hotu tamba dedika liu ba funu. Tinan hanesan envolve iha aktividade sira klandestina nian. Iha 1988, hamutuk ho kolegas na'in 9 harii RENETIL ho nia famozu lema "Antes sem titulo, do que sem Patria". 

Durante tinan tolu, 1991-1994, subar iha ilha Java, hamutuk ho kolegas sira seluk halo reestruturasaun ba RENETIL no kontinua organiza estudantes sira hodi hasoru okupasaun Indonezia nian iha TL. 

Iha 1994, lidera estudantes sira hodi okupa embaixada Amerika nian iha Jakarta. Hafoin sai ba Portugal, kontinua luta iha frente diplomatika no la'o iha kontinente 5 iha mundu hodi halo kampanye ba TL nia ukun rasik-an. Iha Portugal hasai licenciatura iha Sociologia e Planeamento, iha ISCTE, Lisboa.  

Iha TL serbisu iha fatin balu iha Governo nian no hanorin mos iha Universidade balu.