UMA KNUA DADOLIN DOKUMENTUS OPINIAUN SEARCH Online KANOIK LIAFUAN IMPRENSA

      NATUREZA FURAK TIMOR-LESTE

Luto Nacional
em Honra de
Fernando La Sama de Araujo

RENETIL -
Nova Lideranca Mistica
.
Primeiru Ministru Louva Livru RENETIL ne’ebé Publika kona-ba Kontribuisaun Istóriku ba Ukun An
Husi Relativismo ba Consciência.. RENETIL, Aksaun 12 Junho no IMPETTU Selayang Pandang RENETIL




Liafuan/Saky 


Se iha politika ita labele servisu hamutuk, iha asaun sosial no umanitaria, ita bele fo liman ba malu. (Dili, 20/04/2017)


LIAN HODI HATUDU IDENTIDADE RASIK

LIAN HODI HATUDU IDENTIDADE RASIK

Hosi: Freezip Radihka Saky*


I. Introdusaun

Liu tiha tinan atus lima, foin dala ida ne'e, Timor oan sira iha biban organiza konferensia ida hodi haksesuk malu kona ba lian ofisial.

Iha tinan atus hat limanulu nia laran, lian ofisial nebe uza iha Timor mak portugues. Ikus mai, iha tinan ruanulu resin lima nia laran, "Bahasa Indonesia" truka hikas portugues. Lia rua ne'e, uza iha Timor, la'os emar Timor nia hakarak, kolonialistas mak obriga ba povo ne'e.

Ohin loron, kolonialistas lakon hotu ona husi ita rain, tanba sira lakon funu hasoru ema rai na'in. Kolonislista la iha ona iha Timor Loro Sa'e, maibe sira husik hela sira nia identidades balu, ida mak lian (=língua) ne'e.

Povo Timor Loro Sa'e la'o daudaun ona ba iha ukun-an lolos nian. Iha lia (=problema) importante ida agora mosu iha ita nia leet. Lia ne'e mak kaer metin nafatin ema tasi balu (sani: colonialistas) nia lian ou halo Tetun ba lian ofisial Timor nian? Lia ne'e importante tebes tanba, ulun boot sira Timor nian, ohin loron, defende portugues i ema foin sa'e sira defende Tetun. Hakerek ida ne'e nia hakarak buka atu hatan ba husuk ne'e.

Hakerek ne'e, sei dok husi diak, maibe hakerek na'in brani hato'o hanoin ruma, tuir organizadores "seminário" nian husu, atu Timor oan hothotu bele fo nian hanoin demokratikamente.

II. Tetun Nudar Identidade Kultural

Nudar identidade tanba, ho lian Tetun mak povo Timor hodi hatudu nia-an oin-seluk ho lian seluk iha mundu rai klaran. Ida ne'e mak hanesan marka partikularidade (=kekhususan) i isin laran ema Timor nian. Isin laran ida ne'e mak ita bolu identidade.

Inspira husi hanoin Tylor nian (hare iha Rocher, 1982), ita bele defini kultura mak "maneiras" (=cara) hanoin (=pensar), sinti (=sentir) i halo buat ida (=agir) ema ida-idak nian iha sosiedade ida nia laran. Iha aksaun sosial, la'os ema ida hala'o mesak, maibe halo iha grupo nia laran. Grupo ne'e bele oioin. Iha hala'o aksaun ne'e, ema hotu nebe forma sociedade ida i iha kultura hanesan, ninia aksaun atu ou hanesan de'it. Hanesan ou atu hanesan tanba, sira iha valores hanesan.

Ema nia hanoin, nia sinti no ninia hahalok iha mos da'it ho lian nebe sira uza. Hare husi lidun ida ne'e, mak baibain ita hare ema husi "etnolinguística" ida nia hahalok dala ruma la hanesan ho sira seluk nian.

Iha Timor, iha dialektus ou "etnolinguisticas" oioin. Maski iha dialektus oioin, maibe iha valores ida mak halo ema Timor hamutuk. Valores ne'e mak bolu "matak ida-idak nian, tasak ita hotu nian". Iha etnia oioin Timor nian, ida-idak iha nia maneira hanoin, maneira sinti i halo buat ida (matak ida-idak nian), maibe, bainhira hanoin tuir "contexto nacional" nian, kontekstu "tasak ita hotu nian", kontekstu kolektivu ou hamutuk nian, ema Timor ida de'it. Ida de'it la'os tanba de'it "fronteira geopolítica" mak hafahe Timor ho Indonesia ou ho ema rai seluk, maibe "fronteira linguística" hanesan mos indikador ida hodi fahe Timor Loro Sa'e ho Indonesia. Se ita hare tuir "fronteiras dialectos" Timor nian ida-idak, mak ita bele hateten, ema Timor la'os ida de'it, tanba dialektus ida-idak ho ninia fronteiras rasik. Maibe, Tetun nebe ita uza daudaun ou "Tetun Praça" nebe buras husi ibun ba ibun (desenvolve oralmente) husi Fehan (Tetun Los) i "Tetun Terik" bele hakat liu fronteiras dialektus sira seluk nian hodi halibur ema Timor oan tomak nebe bolu povo Timor Loro Sa'e. Tetun bele hakat liu fronteiras sira ne'e tanba, lian ne'e la'os ko'alia de'it iha fatin ida, maibe nia iha knuk iha etnia sira seluk nia leet. Tetun hetan iha iha fatin sira hanesan, Soibada (Manatuto), Viqueque (Viqueque), Balibo i Batugade (Maliana), Suai (Suai) i Fatuberliu (Same). Ikus mai ita kuinese mos "Tetun Dili" ou "Tetun Praça" nebe buras no "sofre mudanças" (=mengalami perubahan) husi Tetun Fehan ho Tetun Terik. Tetun nebe ita bolu Tetun Dili mak ohin loron sai ona lian nasional Timor nian, tanba nia hanesan instrumentu nasional ida nebe Timor oan husi "etnolinguísticas" oioin lori hodi ko'alia i entende malu. Tetun sai ona instrumentu ida nebe halo ema Timor oan sai ida de'it tanba, husi Oekusse liu husi Fronteira to'o iha Tutuala, husi Betanu liu husi Dili to'o iha Atauru, Timor oan hothotu uza Tetun nudar lian nasional hodi halo komunikasaun ba malu. Ho lian Tetun mak Timor oan sira husi "etnolinguística" oioin tur hamutuk ko'alia ba malu iha lia ruma ou iha mate ruma.

Haree husi kontekstu politik nasional nian, ema Timor ida de'it iha lian Tetun nian okos, tanba ho lian ida ne'e de'it mak ema Timor bele "entende" malu. Ho lian Tetun ema Timor lori hodi ko'alia ba malu i lori filozofia "matak ida-idak nian, tasak ita hotu nian", ema Timor husi etnia ida-idak buka konserva ninia identidade i kultura rasik, i hamutuk defende buat hothotu nebe na'in ba ema Timor tomak. Filozofia ne'e rasik hanorin atu grupos etnicos sira Timor nian tenki respeita identidade kulturais i valores ida-idak nian (matak ida-idak nian), i hamrik iha "diversidades culturais" (=perbedaan budaya) sira ne'e nian leten, hodi defende identidade emar Timor tomak nian (tasak ita hotu nian). Tetun ho filozofia, hanesan instrumentu importante rua husi instrumentu oioin, nebe tuir hotu fo tulun makaas ba ema Timor hodi hamutuk tuba rai metin halo funu hasoru ema tasi balu, la haree se mak husi loro monu ou husi lorosa'e, tanba konseitu "tasak ita hotu nian" bolu Timor hothotu tein hamutuk (sani; partisipa) iha funu ne'e hodi defende ema Timor nia direitus no "interesses". Hasoru ema tasi balu, ema Timor ida de'it, tanba hothotu ko'alia Tetun i hothotu sinti buat nebe na'in ba ema Timor tomak (tasak ita hotu nian) hetan ameasa husi li’ur.

III. Tetun Nudar Lian Rezistensia Nian

Tetun la'os de'it nudar instrumentu komunikasaun nian, maibe hanesan hotu instrumentu politik ida nebe hodi halo ema Timor hamutuk. Ho lian ne'e, ema Timor husi dialektus oioin lori hodi halo kontaktu i organiza malu hodi halo funu hasoru Indonesia.

Ema Timor tomak, ko'alia Tetun, la'os uluk, ema ruma mak obriga hanesan lian portugues ho "Bahasa Indonesia" nebe ema tasi balu mai obriga ba ita, maibe ema Timor simu Tetun tuir dalan dame i natural nian.. Lori lian ida ne'e, ema husi "etnolinguística" oioin Timor nian, bainhira hetan malu, sira hato'o sira nia hanoin ho sira nia sentimentus ba malu, iha nebe fo fuan ba halo aksaun hamutuk.

Ita hateten katak, Tetun nudar lian rezistensia nian tanba, ema Timor lori lian ida ne'e mak hodi reziste. Tetun koko tiha ona ninia "resistência" (=ketahanan) iha tinan atu ba atus nia laran. Ita bele haree, iha tinan atus hat lima nulu nia laran, Timor iha kolonialista portugues nia ukun okos i iha tinan ruanulu resin lima nia laran iha Indonesia nia liman kukun laran, portugues ho "Bahasa Indonesia" la "consegue" (=berhasil) halo lakon Tetun. La iha eskola ruma hanorin Tetun, maibe Tetun reziste duni hasoru lian tasi balu sira ne'e. Nia reziste iha familia Timor ida-idak nia uma laran, reziste husi ibun ba ibun (haree mos hakerek husi Waide Watu Laku, Estanislau Saldanha, Ramak Dalak Sanak, Marculino Fraga, Rubi Lobo, Carlos Ximenes i Mau Timor nian nebe tau ona iha rede elektronika). La iha eskola formal ruma ba Tetun, maibe Tetun iha nia uma eskola rasik. Tetun nia uma eskola mak familia Timor ida-idak nia uman. Ema Timor ida-idak sai mestri iha nia familia laran, sai mestri ba nia oan ho bei-oan sira. Tanba ne'e, maski la iha eskola Tetun, lian ne'e bele reziste to'o ohin loron. Tetun reziste tanba nian funsiona hanesan instrumentu komunikasaun nasional Timor nian. Iha funu naruk i todan nebe foin liu daudaun nian, Tetun funsiona nudar lian rezistensia nian lolos, tanba, ema Timor lori lian Tetun hodi halo funu hasoru Indonesia. Liu husi hakerek, liu husi "mensagens" i diskursus, liu husi hananu, liu husi aiknanoik, liu husi soe kantigas iha tebe hodi hamanas ema nia neon hodi halo funu nafatin hasoru Indonesia. Iha rai laran, Tetun representa lian rezistensia nia lolos. Portugues uza hodi hakerek de'it dokumentos nebe hasai ba tasi balu. La'os lori portugues mesak de'it hodi hakerek dokumentus nebe hasai ba leur, maibe lori ingles ho "Bahasa Indonesia" hotu, hanesan Rubi Lobo hakerek:

«Ohin loron, Tetun buras makaas ona, tanba emar (=povo) Timor, lori lian ida ne'e hodi tuba hasoru sukun (=invasao) Indonesia nian iha Timor. Ita rekuinese katak «portugues» mos uza hodi reziste okupasaun Indonesia nian, liliu hodi hakerek dokumentus balu nebe haruka ba leur. Maibe, la'os dokumentu hothotu nebe hasai ba li’ur, ou korespondensia entre resistensia sira, hothotu halo ho «portugues», tanba iha dokumentu balu halo ho «ingles», «Bahasa» no iha mos balu ho Tetun. Iha boletim rezistensia nian balun, hanesan «Halibur» no «Larigutu» nebe uluk publika iha Indonesia, hakerek ho «Bahasa», iha «Neon Metin» hakerek ho «portugues» no «Loriku Lian» hakerek ho Tetun. Boletim sira nebe publika iha Portugal no Australia de'it mak hakerek ho «portugues» no ingles.

(...) Ita uza ema rai seluk nia lian hodi hakerek dokumentus nebe hasai ba li’ur iha nia razaun rasik. Ita hakarak, atu ema rai seluk, hatene lalais ita nia funu nia hakarak no hatene hahalok at nebe Indonesia halo mai ita. La'os tanba ita hadomin tebes lia sira ne'e mak ita hakarak uza. Ita uza tanba mos ita nia lia Tetun, ema tasi balu sira la hatene, nune'e mos se ita hakerek ho Tetun de'it, sei lori tempu naruk ida, foin bele muda informsaun sira iha Tetun ne'e ba lian rai seluk nian, nebe ema barak hatene.

Ho laran nakloke ita tenki hatete katak, ita uza lia rai seluk nian, hodi hakerek surat de'it, maibe iha ita nia aktividades barak liu nebe halo iha Timor no iha Indonesia, kuaze hothotu halo iha lia Tetun. Halo iha lian Tetun tanba, emar Timor, maioria absoluta ko'alia Tetun, sira la ko'alia portugues nebe boot sira defende atu halo ba «lingua oficial». Povo Timor la ko'alia portugues, nem entende. Ho lian Tetun mak povo Timor lori hodi konsiensializa (=menyadarkan) malu, organiza malu, kordena malu no hola desizaun hodi halo aksaun politik hasoru Indonesia, la'os ho portugues» (Lobo, 2000).

Maski Portugues ema oituan de'it mak ko'alia, maibe nia halo parte ona identidade i historia Timor nian. Ita tenki rekuinese, iha dokumentus barak husi "resistência" nian nebe hasai ba li’ur, barak mak halo iha portugues. Haree husi realidade ne'e, ita tenki tau portugues iha kunsiderasaun hotu. La'os portugues de'it, maibe "Bahasa Indonesia" mos. Razaun defende portugues tanba "laços historicos" (=ikatan sejarah) ho Portugal, mak la iha razaun katak Timor la iha "laços historicos" ho Indonesia. "Laços" nebe Timor iha ho Indonesia, hanesan mos "laços" nebe Timor iha ho Portugal. Tanba "laços" sira ne'e mosu husi "historia colonização" (=sejarah penjajahan) nian. Indonesia sei importante liu ba Timor, tanba Indonesia hanesan maluk uma sorin (=vizinho) Timor nian. Maibe, ema barak, ohin loron, seidauk bele simu "Bahasa Indonesia", tanba "crueldade" (=kekejaman) nebe Indonesia halo iha tinan ruanulu nia laran hasoru Timor oan sira, sei manas hela iha emar Timor nia ulun.

IV. Lian Ofisial

Indonesia halo buat at barak, maibe nia hanorin buat diak ida haree husi lidun identidade nian, nebe hateten nune'e: "Bahasa Menunjukan Bangsa", katak lori "Lian hodi Identifika Nasaun".

Bainhira ita halo Tetun ba ita nia lian ofisial, mak ema tasi balu nebe loke relasoens i hakarak serbisu hamutuk ho ita, sira sei buka hatene lian Tetun. Diplomatas sira nebe sei serbisu iha ita nia rain, sei aprende ita nia lian, tanba Tetun sai ona lian ofisial.

La iha dalan seluk hodi haboot i halo ema rai seluk hatene Tetun. Dalan mak ida ne'e de'it, hasa'e Tetun ba iha lian ofisial. Bainhira sai lian ofisial ona, mak Tetun mos bele namkari ba mundo ona, tanba Timor nia sasan nebe hasai ba li’ur, sei hakerek ho Tetun i lian internasionais.

Tetun sei falta buat barak, maibe tanba nia iha "importância" ida mak halo ita defende lian ne'e. Artur Marcos hakerek nune'e:

«La iha lian ida, tanba de'it ninian kualidade gramatika, nian importante liu lian seluk. Lian balu mosu tanba "acidentes históricos" (=kecelakaan sejarah) nebe halo sira sa'e makaas ou iha "relevância" boot liu ou "utilidade" (=kegunaan) i ema barak liu ko'alia lian ne'e. Bainhira ita hateten lian ida "importante liu" lian seluk tanba "razões" (=alasan-alasan) politikas, sosiais, ekonomikas, administrativas. Nunka bele hateten ona motivos "gramatikais" ou to'o motivos hipotétika "pureza" (=keaslian)» (Marcos, 1995: 111).

Importante tebes ita defende Tetun tanba:

  1. "Necessidade" (=kebutuhan) halo kontratu no komunikasaun, halo Tetun sai imporante tiha ona, tanba uluk kedas, emar Timor lori lian ne'e hodi halo komunikasaun;
  2. Tetun nudar identidade nasional emar Timor nian, tanba ho lian ida ne'e hodi haketak emar Timor ho emar Indonesia ou emar Timor ho emar iha mundo rai klaran tomak;
  3. Tetun representa simbolu no "orgulho" identidade nasional Timor nian;
  4. Tetun nudar lian ida nebe hakat liu fronteiras dialektus tolunulu resin Timor nian seluk, hodi halibur Timor oan tomak. Ho lian ida ne'e de'it mak ema Timor oan sira husi dialektus oioin bele entende malu;
  5. Tetun sai ona lian nasional Timor nian, tanba ema Timor oan tomak kuaze hothotu ko'alia lian ne'e;
  6. Iha tinan ruanulu resin lima ikus ne'e nia laran, Tetun sai importante liu tan, tanba Timor oan sira, lori lian ida ne'e hodi halo kontaktu ba malu, hodi konsiensializa no organiza malu hodi halo funu hasoru Indonesia;


  7. Tetun seidauk uza ba serbisu administrasaun nian. Seidauk uza tanba nunka hetan fatin. Maibe Igreija rekuinese Tetun nudar lian ofisial Igreija Timor nian. Igreija lori lian ida ne'e hodi halo "oração", halo missa no sst.

Iha defende Tetun ba lian ofisial, Rubi Lobo hateten:

«Atu adopta lian ida hodi halo ba lian ofisial, mak haree husi istoria no ema uza barak liu, Tetun mak prense (=memenuhi) liu kondisoens. Nune'e mos, Tetun nudar «herança» (=warisan) ita nia bei-ala sira nian no portugues nudar «herança» kolonial nian. Agora ita tenki hili, kaer metin ida «herança» ita nia bei-ala sira nian ka kaer metin «herança» kolonial nian? Ita tenki defende uluk ita nia «herança» rasik, tanba ida ne'e mak hanesan simbolu no identidade ita nia rasik, hafoin mak ita haree fali «herança» kolonial nian» (Lobo, 2000).

Ita rekuinse katak, Tetun sei kiak iha aspektus balu, seidauk iha infra-estruturas naton hodi hanorin eskola, sei lori tempu hodi traduz siensia oioin ba iha Tetun. Maibe ne'e la signifika katak Tetun labele sai lian ofisial.

Timor oan hotu sei sinti "orgulho" (=bangga) liu, bainhira uza lian Tetun rasik ba lian ofisial Timor nian. Ho ita nia lian rasik hodi bele konserva diak liu tan ita nia identidades kulturais seluk i fo "espírito" liu tan ba Timor oan sira atu haburas i haboot nia kultura rasik.

Ko'alia kona ba partikularidade identidade, mak ita bele hatete, Ita nia partikularidade iha ita nia identidade rasik, la'os iha buat sira nebe foti husi rai seluk nian. Ema Timor sei sinti "orgulho" (=bangga) liu tahan Indonesia nia influensias ho lian Tetun rasik. Portugal "consegue" (=berhasil) tahan España nia influensias, tanba sira lori sira nia lian rasik, la'os ba "empresta" ema seluk nia lian. Ita seidauk bele garante (=menjamin) katak, ema Timor bele tahan Indonesia nia influensias ho lian portugues, tanba ita seidauk hatene katak ema Timor "orgulho" ba lian portugues ou lae. Ita seidauk hatene lolos, ema Timor sinti portugues ne'e hanesan nia identidade i nia lian lolos ou lae. Ema balu hateten, susar lori Tetun hodi tahan influensias kulturais Indonesia nian, tanba Tetun ho "Bahasa Indonesia" atu hanesan. Tetun oin seluk tebes ho "Bahasa Indonesia". Portugues ho español mak atu hanesan, tanba ita ko'alia portugues ema español sira hatene ou kontrariu.

Tetun bele tahan influensia kultural indonesia nian tanba:

1) Lian rua ne'e la hanesan;
2) Ema Timor sinti "orgulho" liu tahan influensias Indonesia nian ho lian Tetun rasik;
3) Susar lori portugues hodi tahan influensia Indonesia nian, tanba portugues la'os ema Timor nia lian.

Bainhira ita uza Tetun rasik, foin ita hatudu ita nia partikularidade lolos. Tanba ita la'os hatudu de'it ita nia partikularidade iha "região" de'it, maibe iha mundo rai klaran tomak. La iha tan rai ida mak ko'alia Tetun, maibe ita mesak los de'it. Se ita uza portugues nudar lian ofisial, ninia partikularidade ladun makas hanesan Tetun, tanba rai barak ko'alia portugues.

Maibe, hanesan ita hotu hatene, realidade hatudu katak, sei iha susar barak bainhira ita uza los de'it Tetun, tanba lian ida ne'e seidauk "desenvolve" diak i seidauk iha "infra-estrutura" lian Tetun nian. Atu hakat liu susar oioin nebe iha, tuir hakerek na'in, ita bele uza portugues ho Tetun dala ida hodi hala'o ita nia administrasaun i hodi hanorin iha eskolas.

V. Relasoens i Koperasoens Internasionais

Ita hotu hatene Tetun sei kiak, i aban bainrua Tetun "desenvolvido" ona mos, ita presiza nafatin lian internasionais hanesan portugues, ingles, frances i sst.

Mosu relasoens i kooperasoens internasionais la'os tanba de'it iha lian hanesan, maibe liliu tanba "interesses" hanesan. Ita haree Uniao Europeia, Asean, APEC, NATO i selu-seluk tan, la'os mosu tanba sira iha lian hanesan, maibe tanba iha "interesses" hanesan.

Relasoens i kooperasoens internasionais bele hala'o liu husi organizasoens regionais, internasionais i bilaterais. Timor mos sei halo parte organizasoens regionais i internasionais nebe ita iha "interesses" hanesan. Timor sei tama iha ASEAN, Forum Asia Pacífico, APEC, ONU i sst, nebe ita iha "interesses" iha laran. Haree husi buat hirak ne'e hotu, mak ita lalika hakfodak bainhira ita uza Tetun. Ema rai seluk la sei izola Timor tanba de'it ita uza Tetun. Buat hothotu iha mundo rai klaran ne'e, hala'o iha "interesses" nia leten.

Rai seluk sei hakarak halo relasoens i kooperasoens ho Timor, la'os haree husi lian nebe ita uza, maibe haree husi sasan nebe ita "produz" iha kualidade diak ka lae. Ita nia riku i soi sira iha rai laran "promete lucros" (= menjanjikan keuntungan) barak ba sira ka la'e. Ita nia "materias primas" dada sira nia laran ou lae. Se sasan nebe ita "produz" la iha kualidade i ita nia riku i soi la "promete lucros" barak, mak ema tasi balu sei ladun "interessado" (=tertarik) atu halo relasoens i kooperasoens ho ita.

Rai barak la hatene ko'alia japones nia lian, maibe sira "interessado" tebes sosa "produtos" Japuan nian, tanba sasan nebe rai ne'e hasai iha kualidade diak. Ida ne'e hodi eksplika katak, la'os "lingua" mak hanesan "factor determinante" (=faktor penentu) iha relasoens i kooperasoens internasionais, maibe "interesses" ekonomikus i politikus mak hanesan "factor determinante".

Iha relasoens i kooperasoens internasionais, Timor bele uza portugues ho ingles. Uza portugues hodi halo kooperasoens ho rai sira CPLP (Komunidade husi rai sira ko'alia portugues) i uza ingles hodi halo relasoens i kooperasoens ho rai sira nebe la ko'alia portugues ho Tetun. Iha serbisu internasionais balun, ita bele halo ho Tetun, hodi hatudu ita nia identidade nasional, maibe iha serbisus pratikus nian, hanesan iha komersius internasionais, ita bele halo ho portugues ou ingles. Ita tenki ko'alia lian nebe ema seluk "entende" (=mengerti), nune'e hodi fasilita rasik kooperasoens ne'e. Japaun ho susesu halo ninia relasoens i kooperasoens internasionais ho lian ingles, maski sira iha sira nia lian ofisial rasik. Ita mos sei halo nune'e.

VI. Relasoens ho CPLP

Ohin loron, ema balu preokupado tebes, se ita la uza portugues, mak ita lakon ona "laços históricos" ho Portugal i rai sira nebe ko'alia portugues (PALOPs i Brasil).

Iha dalan barak ba ita atu hametin ita nia "laços" ho Portugal ho CPLP

1) Hanorin portugues nudar lian "obrigatoria" iha eskolas, nune'e hodi ema Timor hatene nafatin portugues. Bainhira povo Timor hatene ko'alia português, mak Timor bele sai membru CPLP. Tanba CPLP la'os forma de'it husi rai sira nebe ko'alia portugues nudar lian ofisial, maibe mos husi "comunidade" (=masyarakat) husi rai sira nebe ko'alia portugues.

2) Timor, Portugal, Brasil ho PALOPs (Angola, Moçambique, Guiné-Bisau, Cabo Verde, São Tome e Principe) bele forma organizasaun foun ida hodi halo serbisu hamutuk iha area oioin i hametin nafatin "laços historicos" nebe iha, maibe la presiza hamrik iha lian ofisial hanesan nian leten. Ou fo forma foun ba CPLP, katak rai nebe tama iha organizasaun ne'e, la presiza haree husi lain ofisial portugues, maibe haree husi "história colonização" (=penjajahan) nian, haree husi relasaun "irmandade" (=presaudaraan) i solidariedade nebe iha. "Irmandande" no "solidariedade" nebe mai husi kolonizador ida, mai husi terus hanesan, mai husi tulun malu no serbisu hamutuk iha prosesu ukun-an nian. La presiza hamrik iha lian ofisial hanesan nian leten tanba, realidade balu hatudu ona, hanesan "commonwealth state" (=negara-negara persemakmuran) Inglaterra nian, nebe uluk halibur de'it rai sira nebe ko'alia ingles i kolonia Inglaterra nian. Agora sira loke an liu tan. Moçambique nebe la ko'alia ingles i la'os kolonia Inglaterra nian, ohin loron, halo parte hotu "commonwealth" ne'e. Guiné-Conacri nebe la ko'alia portugues i la'os kolonia Portugal nian, ohin loron husu atu tama hotu iha CPLP. Ho lia-fuan seluk katak, Timor mos bele tama iha CPLP, maibe la presiza atu halo portugues ba lian ofisial. Timor mos bele tama iha "commonwealth state" Inglaterra nian, tanba Timor nia maluk uma sorin, barak mak halo parte "commonwealth" ne'e.

Atu hametin "laços historicos" ho Portugal, iha dalan barak tebes:

1. Liu husi "religião católica" nebe Portugal husik hela iha Timor i ohin loron halo parte ona hanesan identidade kultural povo Timor nian; 
2. Loke "Instituisaun Lian Portugues" iha Timor hodi hanorin nafatin portugues ba Timor oan sira;
3. Hanorin portugues hanesan "língua obrigatoria" iha eskolas;
4. Bele halo portugues ba lingua ofisial Timor nian.

VII. Propostas

Tuir hakerek na'in nia hanoin, portugues mos importante. Importante tanba nia halo parte ona historia Timor nian iha sorin ida i iha sorin seluk, materias hodi hanorin eskolas iha lian portugues kompletu liu. Maibe iha mos problemas seluk, Portugal, Brasil ho PALOPs dok tebes husi Timor i ema Timor nebe ko'alia portugues oituan tebes. Tulun nebe rai sira ne'e haruka mai Timor, sei lori fulan i tinan mak foin to'o i sei hasai "despesas" (=biaya) makas tanba nia "distância" nebe dok tebes. Enkuanto Tetun, ema Timor kuaze hothotu ko'alia, maibe Tetun seidauk desenvolve diak, sei falta materias barak hodi hanorin eskola. Atu hamosu infra-estruturas Tetun nian iha tinan rua ka tolu mai, sei susar tebes. Se presiza buat barak hodi "desenvolve" Tetun. Se presiza ema matenek husi disiplina oioin nebe domina Tetun diak hodi halo tradusaun siensias universais oioin ba iha lian Tetun.

Haree husi susar oioin sira ne'e hotu, tuir hakerek na'in nia hanoin, diak liu uza portugues i Tetun hotu dala ida nudar lian ofisial. Ida ne'e la'os de'it buka sai husi susar oioin nebe ita hasoru, maibe buka "evita" (=mencegah) mos atu Timor oan sira labele fahe malu tanba de'it problema lian ofisial. Ho solusaun ida ne'e, Timor oan hothotu sinti manan tanba lian rua ne'e hotu hamrik aas hanesan.

Se ita uza lian ofisial rua, oin-sa mak bele aplika lian rua iha Estado ida nia laran? Portugues hamutuk ho ingles uza iha serbisu sira nebe da'it ho relasoens eksternas nian i Tetun hodi hala'o buat hothotu nebe "ligado" ho administrasaun rai laran nian ou aktividades politikas, ekonomikas i sosiais iha rai laran nian. Iha diskursos internasionais, ulun Governo i Estado Timor nian, bele uza Tetun, portugues i ingles hodi halo diskursos iha ONU ou iha forum internasionais seluk.

Maibe, se lakohi atu uza lian ofisial rua, entaun, ita labele ses husi referendum ida. Tenki halo referendum ida hodi povo mak hakotu rasik. Husik ba Povo mak hili lian nebe diak liu atu halo ba lian ofisial Timor nian. Referendum labele halo iha tinan hat lima mai, maibe halo iha tinan nen ou hitu mai. Tanba sa mak tenki halo iha tinan nen ou hitu mai? Tenki fo tempo dok oituan hodi bele prepara Tetun didiak nune'e mos bele fo tempu atu Timor oan sira aprende portugues. Bainhira iha infra-estruturas kompletu ona, i Timor oan hotu domina diak ona lian rua ne'e, foin halo referendum hodi ema ida-idak hili tuir nia "consciencia" rasik. Ho nune'e, bainhira povo hili lian ida, lian ne'e prontu tiha ona hodi hala'o serbisu iha kampu hothotu.


VIII. Recomendasoens


1. Harii Instituisaun Lian Tetun hodi bele tulun "desenvolve" lalais Tetun;
2. Halo "seminario", "conferência" ou "congresso" kona ba lian Tetun hodi bele publika livrus kona ba gramatikas i verbos Tetun nian;
3. Buka publika boletim, jornais, revistas, livrus i sst iha lian Tetun
4. Hanorin Tetun, portugues, ingles ho "Bahasa Indonesia" hanesan lian "obrigatoria" iha eskolas.

Rahun diak ba participantes seminario nian tomak i sucesso ba seminario.

Bibliografia:

1) MARCOS, Artur, (1995), "Timor Timorenses, Com Suas Línguas, Literaturas, Lusofonia ...", Lisboa, Edições Colibri.
2) ROCHER; Guy, (1982), "Sociologia Geral 1, 4ª Edição, Lisboa, Editorial Presença
3) LOBO, Rubi, (2000), "Deklarasaun Politik Hodi Defende Tetun, Dili.

Nota: Artigu ne'e foti hosi "yahoogroups timor-oan"
Data publikasaun 9 Abril 2000

No comments:

Post a Comment


123456789
1. Membru RENETIL Ho Matan Ben Simu Matebian Lasama 2. Primeiru-Ministru Louva Livru RENETIL Publika kona-ba Kontribuisaun Istóriku ba Ukun An 3. Sekjer RENETIL ho Hakerek nain Carlos Saky entrega livru ba PR Taur MR 4. STL - Livru RENETIL iha Prosesu Libertasaun Timor-Lorosae 5. Lansamentu Livru Antes Sem Titulo do Que Sem Patria 6. Sasin no envolvimentu Dr. Rui de Araujo alias Agil nudar militante RENETIL 7. RENETIL - Nova Lideranca Mistica 8. Homenagem a Fernando Lasama de Araújo 9. PN Diskuti Malu Tamba Livru RENETIL